"Pricerunner” şirkəti dünyanın ən bahalı şəhərinin müəyyən edilməsi yönündə araşdırma aparıb. ANS PRESS-in MIGnews.com saytına istinadən verdiyi məlumata görə, şirkət dünyanın 32 müxtəlif şəhərlərində 25 adda məhsulun qiymətini müqayisə edib. Araşdırmalar nəticəsində yeni il ərəfəsində ən bahalı şəhər kimi Norveçin paytaxtı Oslo seçilib. 
Oslada qiymətlər siyahıda yer alan digər şəhərlərə nisbətən 40 faiz bahadır. Norveç paytaxtının sakinləri bərbər, stomatoloq xidmətinin bahalığından, həmçinin obyektlərin icarə haqqı və ictimai nəqliyyatda gediş haqqlarının bahalığından şikayətləniblər.

Ən bahalı şəhərlərin siyahısında ikinci yeri Braziliyanın San-Paulu şəhəri tutur. San-Pauluda məhsulların qiyməti digər şəhərlərdəkilərə nisbətən 20 faiz bahadır.

Siyahının sonrakı yerlərində müvafiq olaraq Stokholm, Sidney və Kopenhagen şəhərləri yer alır. Ən bahalı şəhərlərin siyahısının son pillərində isə Hindistanın Mumbay, Taylandın Banqkok və Polşanın Varşava şəhərləri qərarlaşıb.